أسس بيتك على زوقك

Scroll this

افرش/ى بيتك بنفسك & بيتك على زوقك
ناس كتير مبتحبش تلجأ لمهندسى الديكور و دة يرجع لعدة اسباب منها العامل المادى
نظرا لان مهندس الديكور بياخد مبلغ و قدرة و دة هيسبب اعاقة خاصتا لو فى بداية حياتك .

فن الديكور :
هو فن تزيين الفراغ . يعنى انا عندى غرفة ما عاوز اجهزها و افرشها
بحاول اختار الاستايل و الالوان المناسبة للاستايل دة بما فى ذلك تخيل مبدئى لعملية ملأ الفراغ دة
اولا نحدد مع بعض الاستايل اللى انا عاوزة او زوقى اللى بيميل لية .
يعنى مثلا كلاسيك ولا مودرن ؟؟ باختصار
الكلاسيك

classic

( هو كل شىء بيبان فية عبق التاريخ و الفخامة و عادة بنلاقية فى الاشياء المشغولة او المذهبة )

المودرن

modern

( هو كل شىء بسيط مريح للعين و اكتر حاجة بتميزة انة من غير تفاصيل كتير و الوان
غير عاكسة للضوء )
طبعا فى ناس مبتقدرش تستحمل الكلاسيك بتفاصيلة الكتير و التعب فى تنظيفة و كمان فى ناس تانية
مبتقدرش تستحمل هدوء و بساطة المودرن اللى بالنسبة ليهم بتبقى حاجة قاتلة من غير روح
فبيعملو حاجة اسمها دمج
و هنا بيتم دخول الاستايلين دول مع بعض للخروج بحاجة مريحة للعين , بس حتى عملية الدمج دى
بتبقى محتاجة فن شوية لان احتمالات عدم التوافق فيها كبيرة جدا
بعد تحديد الاستايل اللى انتى / انت بتميل لية هتبدأ تعمل تخيل و تنزل تشوف الفرص المتاحة ليك
من الاثاث و على اساسها تبدأ تختار الالوان ( متنساش تاخدى / تاخد رأى الطرف التانى 🙂 )
فى قصة اختيار الالوان دى حاول قدر المستطاع تختار الالوان اللى هتكمل معاها الخمس سنين
الجايين على الاقل , لانة و ببساطة من اكتر الحاجات المتعبة فى تغيريها هى عملية تغيير الدهانات
و كمان خد فى الاعتبار ان بيتك دة اكتر مكان تقريبا انت بتقعد فية و لازم تكون مستريح نفسيا
و انة لازم الالوان متبقاش متعبة للاعصاب . و لا تكون هادية هدوء الملل .
اختار الوان ممكن تكون مفرحة و تليق بكل الاثاث دون الانحراف عن الاستايل اللى تم تحديدة قبل كدة

الموضوع اللى احنا اتكلمنا فية دة بيبقى محتاج شوية وقت لانك مبتبقاش جاهز ولا عندك
خطوط تواص مع الموردين و القرار بياخد وقت شوية .
انصح فى اتخاذ خطوات فية على الاقل قبل ميعاد احتياجك للشقة ب 6 شهور

هنا احنا قدرنا بشكل او بأخر المساعدة فى اختيار الاستايل . و دة تقريبا جزىء كبير
و مهم لانة فى ناس شافت حاجات كتير و مش عارف دى تحت اى تصنيف .
المرحلة اللى جاية هى ( الكروكى )
هنجيب ورقة A4 عادية و نبدأ نعمل كروكى لمساحة الشقة بأبعدها و نتخيل مع بعض اية
ممكن يبقى فين بأبعاد اية لتحديد اصلا انت هتشترى جاهز ولا هتفصلة
لانة عملية الابعاد دى مهمة جدا
وارد تختار لون تحفة و اثاث مناسب من حيث اللون و الاستايل بس ضخم ف ياخد
المشهد كلة من الغرفة و للاسف بيبقى كل مجهودك و فلوسك راحت على الارض
حاول / حاولى قدر المستطاع حساب الخطوة او القدوم على شراء شىء من اثاث المنزل
عشان متندمش . بالتوفيق 🙂

ملحوظة :
احنا هنا مش بنقلل من مجهودات مهندسى الديكور .
ستظل اسناد المهام لاصحاب الكفائة أفضل مليون مرة من ( الفهلوة )
لانهم بكل بساطة ناس درست الكيف فى الفن و بيخليك تتفادى اخطاء كتير جدا .
بس كتير بيبقو غير قادرين على تكاليف مهندسى الديكور
و كمان كل اللى قولناة دة مجرد طريقة مبسطة بنساعد بيها الناس اللى عاوزة تعمل حاجة
كويسة من غير تكلفة كبيرة